Oblys ákimdiginiń janyndaǵy Jastar isi jónindegi kóshpeli keńestiń Uzynkól aýdanynda otyrysy ótti. Aýdandyq, qalalyq jastar isi jáne mádenıet bólimderiniń basshylary, Jastar rezervi ortalyqtarynyń jetekshileri qatysqan kóshpeli keńes otyrysynda «Qazirgi qazaqstandyq jastar qundylyqtarynyń ornyǵýy jáne qoǵamdyq sanany jańǵyrtý baǵdarlamasy sheńberinde olardyń qalyptasýynyń túıindi aspektileri» jáne «Jastardyń mádenı bos ýaqytyn ótkizý qyzmetterin uıymdastyrý týraly» máseleler tóńireginde keleli áńgime órbidi.Otyrysqa oblys ákiminiń orynbasary Marat Júndibaev qatysty. Jastar isi saıasaty basqarmasynyń basshysy Kenesh Álimjanov oblys óńirinde júzege asqan ister týraly aıtyp berdi.
Jastar saıasatynda oblysta jumys júrmeı jatqan joq. Biraq Marat Júndibaev jastar arasynda belsendiliktiń, kóshbasshylyqtyń tómendep ketkenin aıtty. Ár aýylda, ár aýdanda jastar sońynan eretin kóshbasshylar bolýy tıis.
«Jastar isine bıýdjetten az qarjy bólinbeıdi. Túrli sharalar ótedi, biraq olarda aıtylǵan máseleler tómennen kóterilmeıdi, áıteýir ótkizý keerk bolǵan soń ótip jatady. Kózderi janyp, bastama kóteretin jastar az. Kóshbasshylyqqa laıyq jańa esimderdi izdemeımiz, osydan birneshe jyldar burynǵy esimder jyl da qaıtalanyp atalyp otyrady. Jańa kóshbasshy jastardy tárbıelep, olardy halyqaralyq, respýblıkalyq forýmdarǵa jiberip, ózge elder tájirıbesin úıretip, pysytý, tárbıeleý kemshin» dedi Marat Qonysbaıuly.
Jastar saıasaty isinde ósken, búginde oblystyq máslıhat depýtaty Gúlmıra Qapenova burynǵy «Jastar belsendileriniń mektebin» qaıtadan qalpyna keltirýdi usyndy.
«Qazir ekonomıkalyq-áleýmetttik salada kadrlar, mamandar qanshalyqty jetpese, jastar saıasatynda da tap sondaı belsendi kadrlarǵa degen kedeıshilik bilinedi. Buryn oblysta «jastar belsendileriniń mektebi» bolatyn, túrli sharalar ótkizip, olardy baýlyp shyǵaratyn. Búginde respýblıkadaǵy mınıstrlikterde, memlekettik qyzmette, basqa da salalarda qostanaılyq kadrlar az emes. Solardyń barlyǵy da jas bolǵan, álgi mekteptiń tárbıesin kórgen. Qazir kabınette otyryp, jastardy tárbıeleý qate baǵyt. Jastar júrgen jerde túrli bastamalar kóterilip, jobalar jasalyp, qyzyqty ister qaınap jatýy tıis» dedi Gúlmıra Qapenova.
Jastar isi keńesiniń kóshpeli otyrysyna qatysýshylar úsh seksııaǵa bólinip, ózekti máselelerdi talqylady.
Názıra Járimbet,
«Egemen Qazaqstan»
Qostanaı